10 نصايح للأمهات اللي ولادها هيدخلوا المدرسة أول مرة 

دخول المدارس قرب أوي أو أصلا فيه مدارس بدأت العام الدراسي فعلا وزي ما الأطفال بتعاني وبتضايق من الفكرة فالناس في المواصلات والشوارع برضه بيتضايقوا وزيهم أكتر حد بيطلع عينه هما الأمهات.. بالنسبة لهم المدراس كابوس كل يوم بيصحوا بدري مع ولادهم وبيعملوا ساندوتشات أو لانش بوكس وبيلبسوا وبيسرحوا وبيهدوا الطفل خصوصا لو صغير ويقنعوه إنه محتاج يروح المدرسة وهكذا.

لكن كل ما الأم بتبقى خدت على الموضوع بيبقى الأيام بالنسبة لها أسهل وتقسيمة اليوم برضه أسهل وخلاص بقت عارفة هتصحي تعمل إيه وهي مغمضة عنيها وهتطمن على ولادها إزاي برضه.. لكن الأمهات اللي لسه السنة دي بيدخلوا أطفالهم أول سنة مدرسة فالموضوع بيبقى مرهق نفسيًا عليهم شوية وبيبقوا أصلا قعدوا طول الصيف يجهزوا ويمهدوا لأطفالهم إن خلاص هتدخل المدرسة وكبرت لكن هل الأمهات نفسهم بقي بيبقوا استعدوا للخطوة دي؟ 

لو لا لسه ماستعدتيش لدخول ابنك المدرسة لأول مرة.. فتعالي نقولك على شوية حاجات قالها موقع “rollercoaster” في أحد مقالاته عن شوية نصايح تعملها الأمهات الجديدة اللي هتدخل ولادها المدرسة لأول مرة:

1- حطلهم أكل خفيف في حاجات سهلة الفتح:

مش لازم تبقى وجبات تقيلة وفخمة أوي أهم حاجة الأطفال بيدوروا عليها إنه يبقى الأكل سهل حتى لو العصير برضه يبقى بيتفتح بشكل سهل.. فمن الأول قبل ما الدراسة تبدأ محتاجة تجيبلهم لانش بوكس سهل الفتح وتعمل سندوتشات سهلة الأكل برضه ولو فيه فاكهة تبقى متقشرة زي البرتقان مثلا.

2- خلي عندك وقت زيادة الصبح:

عشان تتجنبي التوتر محتاجة تصحي بدري شوية عن الوقت اللي محتاجاله أصلا عشان بتحصل حاجات ساعات غير متوقعة خصوصا في الأيام الزحمة اللي زي دي.. ده غير كمان إنه لو أول يوم مدرسة هتبقى عايزة تصوريه فخلي فيه وقت زيادة وكفاية في تقسيمة يومك كده كده بس أول يوم زيادة شوية عشان تقنعيه يتصور.

3- حاولي توصلي المدرسة كمان بدري:

عشان تحمي طفلك من الضغط بتاع يلا عشان متأخرين فحاولي توصلي بدري حتى لو 10 دقايق عشان على الأقل تتدخليه الفصل وتتأكدي بنفسك إنه قعد في مكان مريح بالنسبة له قبل ما تمشي.

4- بلاش تتوتري:

احتمال في اليوم ده تبقي متوترة ومتضايقة شوية عشان ده أول يوم هيبقى بعيد عنك عدد ساعات كتير كده ومش هتبقي عارفة عنه حاجة إلا في أخر اليوم بس بلاش طبعا تقولي ده لطفلك وبلاش يبان عليكي لإنهم هيحسوا فكل ما كنتي هادية أكتر بقوا هما كمان أهدى وأكيد طبعا حاولي ماتعيطيش قدامهم بس لو عايزة تعيطي بعد ما تمشي اعملي كده.

5- ماتختفيش:

اقعدي في الفصل معاهم شوية لمدة دقايق حتى لو 5 دقايق عشان تتأكدي إنهم كويسين قبل ما تمشي لكن بلاش تسبيهم في الفصل وتمشي على طول كده لإن دي حاجة هتوترهم جدا.. وقبل ما تمشي فهميهم إنك هتمشي كمان 5 دقايق وقبلها على طول قوليلهم باي ولو بدأوا هما اللي يعيطوا اسمعي وقتها كلام المدرسة وطمنيهم إنك هترجعي تاني.

6- اتواصلي مع المدرسة بتاعت طفلك:

المدرسات بيبقى عندهم خبرة كبيرة في الحالات اللي زي كده وإنهم بيأهلوا الأطفال لده عشان كده خليكي واثقة فيهم واسمعي كلامهم بغض النظر عن اللي طفلك حاسس بيه في الوقت ده سواء كان حزن أو توتر أو غضب فهما هيقدروا يهدوه وأكيد شافوا حالات زيه كتير كل سنة كده.

7- قولي لأطفالك إنك واثقة فيهم:

اتأكدي إن أول ما الطفل يحس إنك واثقة فيه هو كمان هيبقى واثق في نفسه حتى لو كان بيتكسف أو بيواجه شوية صعوبات إنه يعمل صداقات، فبلاش تحسسيه إنه شاكه فيه.

8- اتأكدي إنك لازم توصلي بدري في المرواح:

قبل ما وقت المرواح يجي محتاجة تكوني وصلتي بدري شوية حتى لو قبلها بدقايق وده شئ بديهي بس مهم عشان ماينفعش الطفل نفسه اللي يستناكي لإن ده شئ مرعب جدا بالنسبة له.

9- خططي لإي حاجة ممكن تعملوها بعد المدرسة:

خططي إن يبقى فيه شوية وقت حتى لو بسيط بس يبقى ممتع ومسلي بالنسبة للطفل خصوصا في أول فترة في الدراسة أو أول يوم حتى لإن ده هيخليه يبقى أهدى وممكن يقدر يتكلم معاكي عن اللي حصل في يومه.. ومش لازم تبقى خروجة كبيرة يعني ممكن تاكلوا أيس كريم أو تخليه يركب مرجيحة.

10- خططي في تنظيم وقتك لليوم لتأخيرهم في النوم:

معروف طبعا إن أول ما الطفل بيدخل السرير بيبدأ يتكلم عن أي حاجة بتسببله خوف أو قلق وأي مشاكل بيقابلوها خلال يومهم.. عشان كده استعد لده عشان ده هيأخر نومه شوية وابدأي روتين نوم الطفل بدري شوية عن ميعاده عشان أكيد طبعا مش هتبقى عايزاهم يسهروا ويتعبوا في اليوم اللي بعده.

وفي النهاية محتاجين نقولك إننا واثقين فيكي وإنك قد المسؤولية وإن الموضوع مش صعب وأول ما تتعودي هتعملي كل ده وأنتي مغمضة عينك كمان.