8 علامات هتعرفك إنك في بيئة عمل صحية ومريحة

الشغل حاجة أساسية لينا كلنا لأنه مصدر رزقنا وبيحسسنا بالإنجاز وتحقيق الأهداف.. ومكان الشغل نفسه بقى يعتبر بيتنا التاني اللي أحيانًا بنقعد فيه أكتر من بيتنا أصلًا.. عشان كده لازم بيئة الشغل تكون مريحة نفسيًا لأن ده بشكل مباشر بيأثر على على نفسية وإنتاجية الموظفين ونجاح الشركة واستمرارها..

ووفقًا لمقالات منشورة على موقع منظمة الصحة العالمية وموقع Businessnewsdaily دي 8 علامات هتعرفك أنت في بيئة عمل مريحة وصحية ولا لا؟

1-مديرك: فيه مقولة بتقول “كل قائد مدير بس مش كل مدير قائد” والفرق بينهم إن القائد بينورلك طريقك.. وبياخد بإيديك ويرشدك للصح.. وطول الوقت يعلمك ومش بيبخبل عليك، لكن المدير مجرد منصب إداري مش بالضرورة يكون مؤهل للدور القيادي ولا يقدر  يتعامل مع موظفينه ولا يكتشف مهاراتهم .

2- رأيك:  لو بتقدر تعبر عن رأيك في المواقف اللي بتمر بيها الشركة وتشارك في صنع القرار ده هيخلي نفسيتك أفضل وواثق في نفسك ومتحمل للمسؤولية عكس ما تكون كل آرائك مش بتتاخد بعين الاعتبار.

3- تقديرك: مهم جدًا سواء ماديًا بمرتب مقابل شغلك يحسسك بالاكتفاء المادي.. ومعنويًا حتى لو بـ”شكرًا” اللي كفيلة تسهرك الليالي وتبذل مجهود أكبر وتكون حريص على نجاح الشركة.. عكس الإحباط واللامبالاة اللي هتحس بيهم لو ده ماحصلش.

4- زمايلك: لو شكل علاقتك بيهم كويسة ومبنية على الاحترام وحب الخير لبعض وبتشوف مساعدة القديم للأجدد هتحس فعلا إنهم أهلك وأخواتك وده هيحببك أكتر في المكان.. عكس الأشخاص السلبية اللي بتنتقدك على طول ومش بتحاول تقدملك المساعدة أو الأشخاص اللي بتنشر طاقة سلبية بتأثر على باقي زمايلهم.

5- مكتبك: كل ما كان على مستوى كويس من الاضاءة والراحة والنظافة ده هيساعد أكتر على التركيز وزيادة الانتاجية وده اتكلمت عنه ورقة بحثية بعنوان
An Overview of the Influence of Physical Office Environments Towards Employee.

6-  تقييمك: والتواصل بشكل مستمر  مع مديرك عشان تعرف رد فعله على شغلك ده بيخلق علاقة موازية من التفاهم والتقدير.. والمدير الشاطر هنا بيقع عليه مسؤولية أنه يجتمع مع كل شخص بشكل منفرد أو بشكل جماعي حسب الموقف.

7- حقوقك: سواء فرصك في الترقية أو تأمينك الطبي والاجتماعي أو تعويضك عن الساعات الاضافية.. كل ده هيأثر بشكل مباشر في نفسيتك سواء بالسلب أو الإيجاب.

8- رضاك: عن أوضاع الشغل بشكل مباشر بيأثر على الإنتاجية وده أكدته تقارير منظمة الصحة العالمية في 2019 أن 15٪ الموظفين بيعانوا من الاكتئاب والقلق وده بيكلف الاقتصاد تريليون دولار سنويًا.

في النهاية.. الغرض من الموضوع ده مش إنك تكره شغلك وتكره حياتك، لكن مهم أوي تعرف اللي ليك واللي عليك عشان تقدر تشتغل أكتر وتنجح وتنبسط…

Related Articles

Back to top button