إزاي تتعامل مع الشخص اللي بيغضب بسهولة
لما تقعد مع شخص مزاجه مش كويس أغلب الوقت ده شئ هيبقى مرهق جدا بالنسبة لك، وممكن يخلي حياتكوا كئيبة أيا كان مين الشخص ده في حياتك، وهتخليك طول الوقت تبقى خايف تقول أي حاجة أو تتصرف أي تصرف يزعجه أو يتقمص منه، ولإن الشخص القماص هو شخص مرهق جدا خصوصا لو كان قمص عمال على بطال ومن أي حاجة قررنا نقولك إن التعامل مع المواقف الصعبة دي مش مستحيل هو محتاج منك تعمل شوية خطوات بس موقع “classroom” قالها في واحد من مقالاته وهما:
1- ماتاخدش الموضوع بشكل شخصي:
خلي في اعتبارك إن فيه 7 مشاكل أساسية وهما الغضب والأذى والإحساس بالذنب والخوف وانعدام الأمن “الانسيكيورتيز” وقلة الثقة بالنفس ودول اللي ممكن اللي ينتج عنهم مشاكل المزاج السئ وفقًأ لموقع “TeensHealth”، حتى لو ماقولتش ولا عملت حاجة تضايقه بشكل مباشر فممكن ده مايكونش مرتبط بيك بشكل شخصي، وممكن يبقى فيه صراعات داخلية جواه بتحسسه بعدم الأمان، وبالتالي هو بيبقى مابيبقاش قاصد يقلب عليك أو يتقمص أو يغضب بسببك.
2- خليك هادي:
لما الشخص بيكون متضايق غالبا بيبقى بيدور على خناقة أو حاجة تزعله، فخليك هادي وخد نفس عميق وحاول تروق دماغك قبل ما تواجهه في اللي مضايقه، ولو كان اتعصب وانتوا بتتكلموا اهدى واقترح عليه يبقى أهدى، وزي ما قالت أخصائية علم النفس الإكلينيكي نادية بيرشون في مقالها على موقع “Psych Central” إنك كل ما تخلق مساحة عاطفية وجسدية بينك وبين الشخص الغضبان ده بيخليك أقوى وعشان كده حاول تشجعه على الهدوء وبلاش تدخلوا خناقة ويتعصب أكتر.
3- خلي فيه مجال للتنفس:
بمجرد ما الشخص بيحس بالضيق فأنت محتاج تسيبه شوية وقت قبل ما تتكلم معاه، والوقت ده ممكن يبقى حوالي 20 دقيقة على الأقل زي ما بيقول أستاذ القانون “جون شيفر”، وقال كمان حاول تقرب من الشخص اللي متضايق ده بتعاطف وقوله إنك أسف إنه غضبان كده واسمحله يعبر عن مشاعره بالكلام ويقول اللي مخليه متضايق، واسمعه كويس وهو بيتكلم عن طريق إنك تحافظ على الاتصال بالعين بينكوا ودور على حاجة تتفق معاه فيها، واسمع كمان لاعذاره.
4- خليك متعاطف:
وضح للشخص إنك مش هتبقى معه لما بيبقى متعصب أوي، وخليك لطيف ومهتم ومحترم لما يكون غضبان، بس ممكن تقدم له مساعدة هو محتاجها وممكن تخفف عنه التوتر اللي بيبقى سبب إنه يبقى غضبان.
