إزاي تقول لحد بيحبك إنك مش بتبادله نفس الشعور؟
كلنا بنمر بموقف إن يبقى فيه حد انت بتقدره وبتعزه لكن مشاعره تتطور في اتجاه عاطفي، وانت ما تبقاش بتبادله نفس المشاعر دي، ساعتها بيكون الموقف تقيل وسخيف وبيهدد صداقتك أو علاقتك الطيبة بالشخص ده، لكن للأسف هو موقف لازم يتواجه ولازم تتعامل معاه بحسم، عشان كده جبنالك شوية نصايح زي ما ذكرهم موقفه “lovepanky” حطهم في دماغك وانت بتجهز للخطوة دي!
1- خد الخطوة بسرعة، كل ما كان أقرب كل ما كان أحسن، ماتديش فرصة للطرف التانية يحس إن السكة مفتوحة، أو يأول اهتمامك بشيء أكتر من الصداقة، لأن ده هيخلي الموقف محرج قدامك وقدم نفسه لما يكتشف إن الأمور ماكانتش زي ما هو فاهمها.
2- خليك مستعد ومتوقع أي إجابة تتقال، فيه ناس ممكن تهاجمك، أو تحسسك بالذنب، أو تسأل كتير عشان يعرفوا سبب موقفك وإذا كانوا عملوا حاجة، محتاج إنك تبقى ثابت ما تتصعبش لو الكلام هجوم وما تتحرجش لو الكلام كويس.
3- حاول تجاوب على كل الأسئلة، عشان كل إنسان يستحق إن قصته يبقالها نهاية واضحة وفيها تقدير له، حاول بقدر الإمكان ما تبقاش جارح أو قاسي لكن وضح موقفك كويس وقول أسبابك سواء كان شعورك بعدم تناغم أو وجود حد تاني في حياتك…إلخ.
4- حد نفسك مكان الطرف التاني، شوف الموقف ده ممكن يزعجك ويأثر فيك قد إيه عشان تفضل مقدر لأي رد فعل يجي منه، وما تبقاش حاد في التعامل مع الموقف.
5- ما تبالغش في اهتمامك أو تعاطفك، ممكن في لحظة تحس إن ده شخص انت خذلته، وعايز تعتذرله أو تقدمله أي حاجة، بس المبالغة في الموقف ده هتبقى إشارات مختلطة للطرف التاني وكمان في وقت مشوش بالنسبة له.
6- ادي الطرف التاني مساحة، ما تحاولش تبقى موجود حتى لو بتبعت نكت وميمز عشان تحسسه إننا تمام ومفيش حاجة، ده هيخليه صعب يتخلص من مشاعره ويتعود على عدم وجودك.
7- خليك واضح في الشكل اللي عايز علاقتكوا تبقى عليه في المستقبل، وما تقولش كلام وخلاص، يعني لو مستعد فعلًا تبقوا أصدقاء قول كده، لو مش مهتم أو مش مستعد وضح ده، أو ما تجيبش سيرة الموضوع خالص.
8- اقفل الموضوع تمامًا لو لزم الأمر بعد حاولت توضح موقفك وتجاوب على كل الأسئلة، وفضلت الأمور تطول وتتفتح معاها أمور فرعية فمن الأفضل ليك وللطرف التاني إنك تقفل الموضوع وتبعد.
النوع ده من المواقف بيكون قاسي وحزين للطرفين، وأحيانًا شعور شخص إن فيه حد تاني بيقرر عنه يقفل الموضوع أو ينهي قصة ده مستفز، لكن خلينا نقول إن غلاوة شخص عندك أو تقديرك له، هو اللي يخليك تتعامل معاه بشيء يبدو قسوة، لكن هو اهتمام بمشاعره وخوف عليه من تطورها أكتر من كده.
