إيه هي الـ “bird’s-eye view” وهتنفعنا إزاي في حياتنا؟
كتب: أحمد صلاح الأنصاري
في حياتنا بنتعرض لمواقف كتير سواء كانت في العلاقات مرتبطين أو مع صحابنا أو أهلنا.. أو في ظروف الشغل اللي كل يوم فيها جديد.. وكل ده بيحتاج قرار مننا.. وعشان نتعلم ناخد قرار مظبوط من غير مانلبس في الحيط.. بنكون محتاجين نطبق نظرية منظور عين الطائرة أو “bird’s-eye view”
طب يعني إيه “bird’s-eye view” أو منظور عين الطائر؟
منظور عين الطائر معناه ببساطة إنك تبص على الأمور من زاوية عالية وواسعة كأنك طاير فوق وبتشوف المشهد كله مرة واحدة وتاخد بالك من حاجات ماكنتش شايفها في العادي.. بدل ما تتشتت في حاجات بسيطة ووتبص تحت رجليك بس.. بيخليك تاخد خطوة لورا وتحاول تشوف الصورة العامة للموقف عشان تربط كل حاجة ببعضها ونشوف تأثيرها علينا في المستقبل.. وهنا بنفتكر اقتباس من رواية
“مثل إيكاروس” للراحل دكتور أحمد خالد توفيق : “- هل تتنبأ ؟
= “لا توجد أسرار .. أنا ارتقيت التل فقلَّ من يمشون معي ورأيت أبعد فأبعد”
وإزاي نطبقها في حياتنا وهتفيدنا بإيه؟
1- على المستوى الشخصي: الحياة مليئة بالأحداث والمشاكل.. وفيه جزء من الناس بيلوم حظه والظروف وبيضيع مجهوده في الندب.. وفيه جزء تاني مننا بيبص للمشاكل من منظور عين الطائر بيحلل المشكلة ويشوف حلول وبيطور نفسه عشان يتجنب اللي حصل ده ويخرج منه بأقل خسارة المرة الجاية..
ولو عنده حلم عايز يوصله بيبص له من فوق وبيقسم الهدف الكبير لأهداف صغيرة عشان يقدر.
2- العلاقات العاطفية: دايمًا مشاكلنا مع شريك حياتنا إننا بنطلب منه اهتمام وحب ولو متجوزين فلوس أو كوباية شاي.. دايمًا بنعبر عن احتياجنا وبنشوف اللي معانا مقصر.. لكن لو طبقنا نظرية منظور الطائر هنقدر نكتشف قصورنا إحنا كمان ونقدم لشريكنا اللي محتاجه.. فهننقذ العلاقة من حافة الفشل زي ما شيخ الملحنين سيد مكاوي قال: “خلي شوية عليا .. وخلي شوية عليك” وكمل في الآخر وقال: “عشان المركب تقدر تمشي بيا وبيك”.
ووقت المشكلة والدنيا أون فاير.. لو كل واحد وقف شوية وخد نفسه وفكر 5 ثواني هو شريكه ماله اتغير معاه ليه؟ هل دي تراكمات؟ هل عنده ضغوط مأثرة عليه؟ هنقدر بكده نحل الموضوع وتخلص المشكلة خااالص.
3- التعامل مع الأهل: أحيانًا بنختلف مع أهلنا في مواقف بتمر علينا وطول الوقت متحاملين عليهم وماحدش ينصحنا ..إحنا عارفين بنعمل إيه.. لكن لو استخدمنا منظور عين الطائر هيبقى عندنا شوية صبر وهنقدر نسمعهم، هنبطل غضب، وهندرك إن ده خوف واهتمام بينا مش ندية معانا.. ونحاول نوفق جزء من خبراتهم على خبراتنا وناخد قرار مظبوط.. وبالتالي هتقل المشاكل وعلاقتنا بأهلنا هتتحسن عمومًا
4- الشغل (الوظيفة أو إدارة الأعمال): فيه نوعين من الموظفين.. موظف روتيني بيروح يعمل نفس الحاجة كل يوم كأنه ترس بيلف عشان يقبض نفس الفلوس كل شهر.. ونوع تاني عنده منظور عين الطائر بيحاول يحط قدامه هدف أبعد، منصب كبير في الكارير بتاعه.. بيطور إمكانياته وبيسعى فبيوصل.
وكذلك أصحاب البيزنس الناجحين مش كفاية عندهم ايه هامش الربح وأرقام المبيعات لا.. بيشوفوا الموضوع من فوق برؤية أشمل بمنظور عين الطائر بيقيسوا احتياجات السوق والتغيرات المفاجئة فيه واهتمامات العملاء.. ويعرفوا إيه اتجاهات الصناعة والأسواق الناشئة.
5- الدراسة والتعليم: منظور عين الطائر بيتحقق هنا لو عندنا خطة مسبقة للسنة ونعمل لنفسنا “tasks” أو مهام يومية.. وبنبص على حلمنا من فوق ونشوف الدراسة طريق للوصول لهدفنا ويبقى ده حافز لينا.. بدل مابنشوفها في العادي تكديرة وخنقة.. وبنطبق النظرية كمان أيام الامتحانات لما نعمل جدول للمذاكرة ونقسم ترتيب المواد على حسب الأولوية.
6- الفلوس: والموضوع ده بالذات مهم جدًا عشان أغلبنا أول مابيستلم المرتب باليمين بيطيره في الشوبنج وكل ملذات الحياة ده غير الأقساط والجمعيات واللذي منه.. ضروري نستخدم منظور عين الطائر لأن بيخلينا ناخد بالنا من قراراتنا المالية بدل ما نصرف كل حاجة ونشحت طول الشهر.. وافتكر إن قولتلك بلااااااش تتهور.
بشكل عام “bird’s-eye view” أو منظور عين الطائر هو أسلوب بيخليلك الأمور أوضح أشمل عشان ماتندمش بعد ما تاخد قرارك.. فركز واصحى ليغفلونا
