اعرف إيه حكاية دوس على الـ “POPCAT” المنتشرة على السوشيال ميديا!
آخر يومين انتشر على السوشيال ميديا صورة لقطة وهي فاتحة بوقها وانتشرت الصورة كمان على هيئة فيديو ناس بتدوس على الصورة عشان القطة تفتح وتقفل بوقها، واسمها “PopCat”، واتضح بعد كده إن ده موقع اسمه “POPCAT Click”.
موقع “POPCAT Click” هو موقع عالمي وهو عبارة عن صفحة واحدة بس وهي صورة القطة بس وفكرته هي إنهم يدوسوا على بوق القطة وبيسجلوا أهداف بمجرد ما بيدوسوا بس، وكل ما تدوس أكتر كل ما عدد نقط بلدك بيزيد.
وبالتالي أي حد لما بيدخل على الموقع ده مابيمثلش نفسه بس هو بيمثل بلده، وبتظهر نتايج كل البلاد في جزء في آخر الشاشة من الموقع وكل Click الشخص بيعملها في اللعبة بتسبب في زيادة عدد نقط بلده وبيتم تحديث النتايج دي أول بأول وتقدر تعرف بلدك وصلت لفين وأنت بتلعب، وعشان كده ناس كتير واخده الموضوع بشكل وطني جدا وبيحاولوا يوصلوا بلدهم للمركز الأول.
اللعبة كانت تريند في أغسطس اللي فات في دول كتير وظهرت تريند دلوقتي تاني، ولحد يوم 14 نوفمبر كانت عدد الـ Clicks أكتر من 541 مليار و615 مليون ومعدل الـ Clicks عالميا وصل في الثانية الواحدة حوالي 10 آلاف Click.
ولحد لحظة كتابة الموضوع كانت “هونج كونج” هي اللي متصدرة المركز الأول في المنافسة بعدد Clicks وصل لـ 546 مليار Click، والمركز التاني تايلاند والمركز التالت هو تايوان وبعدها اليابان والمركز الخامس كوريا الجنوبية، أما مصر وصلت للمركز الـ 22.
ولحد اللحظة دي برضه من الدول العربية المتقدمة هما السعودية والإمارات ومصر والعراق.
والجدير بالذكر إن كوريا الشمالية عاملة Click واحدة بس لحد دلوقتي وفي المركز الأخير.
لكن لسه فيه أمل عند مستخدمين السوشيال ميديا المصريين إن مصر تتصدر القايمة وتطلع للمركز الأول ولسه بيشجعوا بعض.. وده جزء من الميمز اللي ظهر الفترة دي على السوشيال ميديا عشان يشجعوا بعض .
والموضوع شد الناس ودخل في مرحلة منافسة شديدة، لما بدأ ينتشر “سكريبت” للعبة وده عشان يعمل كليكات على القطة بشكل أتوماتيك، بيتم إضافته عن طريق الـ Console في الـinspect بتاع المتصفح، ولكن برضه الموقع ساعات بيقفش الحركات دي وساعات بتعدي.. وأهم حاجة طبعا المنافسة تكون شريفة يا ولاد.
