تقنية “آبل” الجديدة للكشف عن الاكتئاب

قوليلي إيه يا سيري.. قوليلي إيه حكايتي، هل ممكن موبايلك الآيفون يتفاعل معاك ويفهم إحساسك بالاكتئاب؟ 

موقع “وول ستريت جورنال” نشر تقرير بيتكلم عن تحضير شركة “Apple” لميزة جديدة قادرة على اكتشاف حالتك النفسية سواء كنت في حالة اكتئاب أو قلق أو حاجات تانية.

الميزة اللي بتشتغل عليها شركة “Apple” بالتعاون مع باحثين من جامعة كاليفورنيا في ولاية لوس أنجلوس الأمريكية وشركة “بيوجين” للتكنولوجيا، هتقدر تتعرف على الاكتئاب من خلال البيانات الشخصية اللي بتجمعها أجهزة الاستشعار سواء في الـ”iPhone” أو الـ”Apple Watch” وحاجات تانية زي عدد ساعات النوم والنشاط البدني والحاجات اللي بيكتبها المستخدمين وغيرها.

جامعة كاليفورنيا قالت أن أبحاثها عن الاكتئاب والتوتر والقلق بدأت بشكل تجريبي من 2020 باستخدام ميزة تتبع الوقوع في الـ”iPhone” و “Apple Watch”.

وأضافت إن الباحثين هيقوموا بالتوسع باستخدام بيانات 3000 شخص خلال السنة دي واللي هيتم جمعها من خلال كاميرا الـ”iPhone” ولوحة المفاتيح وأجهزة استشعار الصوت بالإضافة لحركة النوم والعلامات الحيوية اللي بتسجلها الـ”Apple Watch”.

وكمان ده هيشمل، تعبيرات الوجه وإزاي المتطوع بيتكلم، وعدد المرات اللي بيخرجوا فيها وجودة نومهم هل هي كويسة أو لا، وكمان معدل ضربات القلب والتنفس ومن الممكن يكون أبلكيشن “Apple Health” يحذر الشخص إنه في خطر ومحتاج رعاية.

موقع “ديلي ميل” قال إن في السنين الأخيرة انتشرت إشاعات بخصوص طموح “Apple” إنهم يضيفوا خصائص في أجهزتهم بتدعم الصحة العقلية.

وقالت صحيفة “وول ستريت جورنال”، إن “جيف ويليامز” الرئيس التنفيذي للعمليات في شركة آبل اتكلم بحماس عن امكانيات الشركة لمعالجة معدلات الاكتئاب والقلق اللي بيزيد حول العالم.

والجدير بالذكر إن شركة “Apple” أعلنت من أسبوع في مؤتمرها السنوي عن طرح عدد من منتجاتها واللي من أهمها iPhone 13، تقدروا تعرفوا أكتر من هنا.