فوائد لا تعرفها عن بذور عباد الشمس “اللب السوري”

في يوم “عباد الشمس” حبينا نعرف شوية فوائد عن البذور بتاعته.. كلنا بنحب نجيب شوية لب في أي وقت خصوصًا بالليل كده في قعدة رايقة عشان نتسلى.. بس اللي مانعرفوش بقى إن فيه شوية فوائد كده غير التسلية دي لبذور عباد الشمس اللي هي “اللب السوري” أو اللب الأسمر حسب ما بتسميه

حسب موقع Healthline وموقع Webmd

8 فوائد لا تعرفها عن بذور عباد الشمس:

1- غنية بالعناصر الغذائية فهتلاقي فيه “فيتامين هـ” وكمان مصدر للماغنسيوم والسيلينيوم والنحاس والزنك.. كلها حاجات ليها دور حيوي ومفيد لوظائف الجسم المختلفة

2- مفيد لصحة القلب وده عشان الدهون الموجودة فيها فبتساعد على تقليل خطر الإصابة بأمراض القلب والسكتة الدماغية

3- بيسد نفسك لو عايز تعمل دايت.. شوية لب حلوين كده لوحدهم أو قبل أي وجبة بحيث ماتاكلش كتير 

4- مصدر لعناصر غذائية بتساعد على تعزيز المناعة وده عشان فيها عناصر غذائية وفيتامينات مفيدة فهتحافظ على الجهاز المناعي وعلى مرونته

5- العناصر المعدنية اللي موجودة فيه بتحافظ على كثافة العظام وقوتها وده هيقلل خطر الإصابة بهشاشة العظام أو الكسور

6- فيها بروتينات نباتية وألياف بتساعد في تحسين صحة الجهاز الهضمي

7- مضاد للالتهابات.. فيها مركبات نباتية زي “الكولين والسيلينيوم وأحماض دهنية غير مشبعة” واللي بيساعدوا على تقليل الالتهابات في الجسم

8- بتظبط الطاقة.. مستويات البروتين العالية اللي موجودة في البذور بتساعدك تفضل نشيط وفايق ده كمان بالإضافة لفيتامين ب1 “الثيامين” بيساعد في تحويل الأكل لطاقة برضه

في الأخر البذور أو اللب يعني مفيدة وبتساعد على حاجات كتير كويسة بس أهم حاجة ماتكترش أوي منها عشان الفائدة تبقى كويسة ومايحصلش مشاكل