المدير والامتحانات مظلومين.. حاجات تانية مش بتخليك مرتاح البال
بييجي عليك وقت خصوصا يوم أجازتك بيكون نفسك في روقان يفصلك عن زحمة الشغل والامتحانات.. راحة بال تبعدك عن الضغوطات.. وبمجرد ما يجي الويك إند وأهو شوية سلام وهدوء نفسي.. تلاقيك بتفرك ومش مرتاح وعايز أي قلق يحصل كده يعمل شوية دوشة.. فتعالى نقولك ليه بتحب الدوشة رغم إن نفسك ترتاح؟
ليه بترتاح للدوشة رغم إن نفسك في الهدوء؟
- التعود: جهازك العصبي اتدرب إنه يعيش وسط ضغوطات يومية كتيرة.. وبقى في حالة تأهب لأي مشكلة.. فلما يقعد في شوية هدوء بيستغرب وده زي ما بنقول إنه “اعتاد القلق”
- التعزيز المتقطع [ intermittent reinforcement]: آلية نفسية بتخلي الشخص ياخد المكافأة أو المدح بشكل عشوائي مش متنظم.. بمعنى لما بتتحط في مشكلة كبيرة وبتحلها بتحس إن دورك مهم زي الأبطال.. والإحساس ده بتبقى عايز تعيشه طول الوقت.. فلو لقيت الدنيا هادية مافيهاش عوق بتتوتر.. وبتدور على أي مشاكل تضغطك وتحلها
- حياتك مافيهاش محتوى: يعني أحداث يومك هي اللي بتديل معنى لحياتك.. فلو حصل في يوم وخلصت اللي وراك.. بتلاقي يومك فضي وقابل بقى هجوم الأسئلة الوجودية: “وبعدين؟ فين حياتي؟” والسؤال ده بيحسسك إنك تايه لأنك متعود تبقى رد فعل للأحداث.. هي اللي بتقود حياتك مش انت
- البيت والتربية: لو كبرت في بيت كله متحدث محدش بيسمع التاني وأصواتكم عالية.. جهازك العصبي بيربط الدوشة بالأمان فحتى لو اتجوزت واستقريت في بيت هادي بتحس إن الدنيا مش مريحة والبيت مش دافئ.. وده مفهومك الغلط عن الأمان
- الإنتاجية: حبك لشغلك واهتمامك بيه زيادة عن اللزوم.. بيخليك عايز تعمل أي حاجة عشان تطور أسرع.. فلو جيت خدت إجازة كام يوم وتفصل حبة بتحس بإن فيه حاجة مش مظبوطة.. هنقعد ساكتين كده! ما أقوم أخدلي كام تاسك كده
- المواجهة مع مشاكلك: أوقات بتتجاهل مشاكلك بإنك تشغل نفسك طول الوقت.. فلما الأحداث بتهدى بتبدأ تفهم إنك هتقابل المصايب وواجه بقى يا وحش عواقب مراكمة مشاعرك
5 طرق تساعدك عشان تتقبل الهدوء وماتخافش منه!
- التقبل: لما تحس إن نفسك في شوية قلق ودوشة.. خد بالك من ده وتقبله.. ماتحكمش على نفسك وادي فرصة لجهازك العصبي إنه يعبر عن قلقه ده عشان يعمل الصح معاك ويهديك
- قسم الهدوء: مش لازم لما تيجي تسترخي تبدأ بـ 3 أسابيع راحة وهدوء مثلًا.. ممكن تبدأ بـ 5 دقايق راحة تتنفس فيهم أو تتمشى حبة وبعدين وتكمل يومك.. ده هيدرب جهازك العصبي إنه يتقبل الهدوء حبة بحبة
- صاحب الملل: لما بتقعد حبة مسترخي بيبدأ الزهق يبان.. فمش لازم تتعامل معاه على إنه مشكلة.. تقبله
- ماتسمعش لنفسك: يعني لو مسترخي وفجأة لقيت عقلك بيلح عليك تعمل تصرف معين.. ادي لنفسك 5 دقايق وبعدها شوف هو التصرف ده ضروري اعمله حالًا ولا عادي يستنى وده مجرد هروب من الراحة
- تصالح مع نفسك: فلما تتقبل نفسك وتحبها هتلاقي إن مفيش أحسن منك صحبة ليك.. وهتحس إنك أخف دم بترمي إيفيهات وتضحك عليها مع نفسك
وعامة بقى الهدوء اللي انت مش طايقه ده بتعرف قيمته لما الأجازة تخلص أو يبدأ الشغل يترمي عليك وتاخدلك تعديلات في بداية الأسبوع.. أو لما تتزنق في امتحانات الميد تيرم لو لسه بتدرس.. فقدر نعمة الراحة والروقان يا عم غيرك متكدر وسط دوشة كتيرة
