حكاية الأم اللي قتلت أطفالها وحاولت الانتحار.. وإيه هو ذهان ما بعد الولادة؟
اليومين دول الأخبار بتتكلم عن جلسات لمحاكمة أم أمريكية بولاية ماساتشوستس قتلت أطفالها التلاتة اللي أعمارهم 8 شهور و3 سنين و5 سنين وحاولت الانتحار بقطع معصمها ورقبتها ولما فشلت رمت نفسها من الدور التاني من شباك بيتها.. ومحاميينها قالوا إنها بتعاني من ذهان ما بعد الولادة غير مشخص.. فهنقولك إيه هو وأعراضه والفرق بينه وبين اكتئاب ما بعد الولادة!
إيه ذهان ما بعد الولادة – Postpartum psychosis؟
اضطراب نفسي بيصيب 1 من كل ألف أم خلال الأسابيع الأربعة الأولى بعد الولادة.. بيحتاج تدخل طبي طارئ.. بيكون عرض واضح للاضطراب ثنائي القطب
بييجي مع التغيرات الهرمونية الكبيرة اللي بتحصل بعد الولادة
أعراضه
- الهلوسة: سواء سماع أو رؤية أو شم أو الإحساس حتى بحاجات مش موجودة
- الأوهام: الإحساس بشكوك أو مخاوف أو أفكار أو معتقدات مش صح
- سلوك مضطرب بشكل واضح.. بيغير الأم تمامًا عن حالتها القديمة
- الهوس: تفكير وكلام كتير بشكل مفرط.. وأرق وفقدان السيطرة على النفس
- الاكتئاب: العياط وفقدان الشغف والشهية والانطواء وقلق شديد وتقلبات مزاجية كبيرة
طب يفرق إيه عن اكتئاب ما بعد الولادة؟
- الفرق إن الذهان بيأثر على الإدراك فبيخلي الأم تعمل سلوكيات تأذي نفسها وأطفالها من غير وعي
- الذهان بيبقى حالة متطورة وحادة أكتر من اكتئاب ما بعد الولادة وبتستمر مدة أطول لأسابيع وشهور كتيرة
- أما الاكتئاب إصابة السيدات بيه بتبقى أكتر من الذهان.. وأعراضه بتكون مشاعرية أكتر من السلوكية زي العياط المستمر وشعور بالذنب والأم تبقى مدركة لمشاعرها بس مابتأثرش على سلوكياتها زي الذهان
ليه الذهان ده بيحصل للستات؟
- التغيرات الهرمونية: هرمون الاستروجين والبروجسترون بيعلى وقت الحمل وبعدين بينزل جدًا بعد الولادة على طول
- الخوف من المسؤولية الكبيرة
- اضطراب ما قبل الحيض الاكتئابي وده أكتر الأعراض الشديدة للـ PMS.. اللي بتحصل قبل بداية كل بيريود زي الصداع وألم الثدي والتقلبات المزاجية الحادة
- التاريخ العائلي للأمراض النفسية زي الاكتئاب أو القلق وخاصة اضطراب ثنائي القطب
مضاعفات ذهان ما بعد الولادة لما مابيتعالجش بيزود خطر الانتحار وأفكار لإيذاء النفس وكمان الطفل.. وبيخلي فيه مشكلة تواصل بين الأم والطفل ويأثر على نموه وتربيته.. وبيخلي فيه ضغط على الطرفين
