خطوات عشان تحمي موبايلك من السرقة

كلنا شوفنا النهاردة الصبح 19 أكتوبر 2021 حادثة سرقة موبايل مراسل اليوم السابع من على الدائري، بعد ما ظهر شخص بموتوسيكل شده من إيده وجري، وحوادث سرقة الموبايل منتشرة من زمان، و عشان كده قررنا نقولكم على كذا خطوة تقدروا تحموا بيها موبايلاتكم من السرقة:

1- لو ماشي في الشارع، حاول تستخدم السماعات لو هتعمل أي مكالمة، ولو هتضطر تطلع الموبايل، ماتحطهوش على ودنك اللي ناحية الشارع والعربيات، خليه على الناحية التانية، وخليك ماشي على الرصيف برضه مش في نص الشارع، لإن كدة هتكون صيدة سهلة لأي حرامي معدي بموتوسيكل ونازل يقلب رزقه ويقلب الناس.

2- لو راكب عربية، ارفع الإزاز سنة صغيرة بحيث مايكونش في مساحة إن إيد أي حرامي تخش العربية، ولو عايز تفتح الإزاز، حاول تنزل إيدك لتحت على قد ما تقدر، وفي حالة إنه حاول يشده منك، ارميه في الدواسة وهو مش هيقدر يطوله.. بس أنت هتقدر تطول الحرامي وتوديه على القسم.

3- لو ماشي في شارع ضلمة وشكله مش أمان، ماتطلعش الموبايل تمامًا وخليه في جيبك لحد ما تقدر تطلع بسلام من الشارع.

4- لو في مواصلات، ركز إن موبايلك يكون في جيبك اللي قدام مش اللي ورا، وأنت حاطط إيدك في جيبك ده، ويا سلام لو الجيب ضيق، ده هيصعب مهمة الحرامي في سرقة الموبايل، فاستنى تطلع من المواصلة اللي أنت راكبها سواء “مترو، أتوبيس، ميكروباص” وبعدين ابقى طلع الموبايل واستخدمه.

5- أحيانًا بيتم سرقة الموبايلات بحركة صايعة، وهو إن يجيلك شخص ويسألك الساعة كام أو ممكن اعمل مكالمة، لو في إيدك ساعة فإنسى موبايلك، لو مفيش في إيدك ساعة، إنسى موبايلك برضه وقوله معرفش وماعييش رصيد، خصوصا لو أنت في منطقة حاسس إنها مش أمان، الحركة دي بيعملها الحرامية عشان يشوفوا الموبايل ذو قيمة ولا لا.

6- لو قاعد في مكان عام “كافيه، مطعم، قهوة” ماتحطش موبايلك على الترابيزة وتنسى أو تقوم تجيب حاجة، أنت مش قاعد في المدينة الفاضلة، موبايلك في جيبك لإن سهل جدا أي حد يشده منك ويمشي.

7- أغلب الموبايلات الحديثة دلوقتي، فيها خاصية تتبع الموبايل في حال فقدانه، فعلها دلوقتي حالًا، في خاصية Find my Phone موجودة على أجهزة آبل،  وFind my Device  لو بتستخدم أندرويد ودايما احتفظ بالعلبة عشان لو لقدر الله اتسرق منك برضه “وده وارد يحصل لإن طرق الحرامية مش بتخلص” تقدر تروح تعمل محضر بكرتونة الموبايل ودي أهم حاجة لإن بيكون عليها رقم ده اللي بتقدر الشرطة تتبع الموبايل منه.

8- في حرامية بيكونوا عارفين قيمة الموبايلات، استخدم Cover عادي مش ملفت للنظر عشان ماتلفتش نظر الحرامي اللي بيدور على حد يقلبه، ولو الـCover بيقفل على الكاميرا ومش بيبين أي تفاصل فيه يبقى خير وبركة.

في النهاية.. الموبايل برضه ممكن يتسرق منك في أي وقت، ولكن النصائح اللي فوق هتساعدك إنك تقلل الاحتمالات دي أو تمنعها خالص.