موضوع مايهمكش: 5 وصفات مختلفة للزيتون

شجر الزيتون بيتزرع في أغلب أنحاء العالم خصوصًا منطقة البحر المتوسط والصين وجنوب إفريقيا والهند وأكيد في مصر… الزيتون من النباتات اللي جواها كوكتيل فيتامينات ومعادن ومفيد جدًا للمناعة وأمراض القلب والسكر وهشاشة العظام… وغير طبعًا أنه لذيذ وبناكله جنب الأكل سواء كان أخضر أو أو أسود أو كلاماتا
لكن النهاردة وعلى غير العادة هنقدملكم 5 وصفات الزيتون داخل فيها بشكل أساسي:

1- سلطة الزيتونية: وهي وصفة فلسطينية سهلة ولذيذة وبتكون عبارة عن زيتنون كتيييييير مع طماطم وخيار وجزر متقطعين مع تاتش كاتشاب والملح زي ما أنتوا عايزين ودي ممكن تنفعك في الدايت

2- باستا بالزيتون: ودي لمحبين الباستا والمرة دي مش بطريقة تقليدية .. وهنا بنحط الزيتون الكلاماتا على المكرونة الاسباجتي بالصلصة ورشة جبنة بارميزان ونزوق الطبق بريحان وبألف هنا وشفا

3- سمكة هامور بالزيتون والطماطم: ودي لعشاق السي فود والبحر ودي وزي ماحنا شايفين هي سمكة هامور عايمة في زيت الزتونة مع طماطم شيري وشبت والريحة خارجة من الصورة

4- لحم بالزيتون: لو نفسك جابتك تاكل لحمة لكن بطريقة مختلفة يبقى مش قدامك غير الطبق ده.. وهنا اللحمة بتتسلق عادي مع البصل والحبهان وورق اللورا والفلفل وبعدين هيضاف لها الزيتون وقلب قلب  لحد ما الأطعمة تاخد من بعض وأغرف شوية مع شوية مع أرز أبيض عشان تكمل العظمة

5- طاجن دجاج بالزيتون: وأخيرًا ميعادنا مع وصفة لأصحاب المزاج العالي وهنطير للمغرب عشان نشوق طاجن دجاج في الفرن بالزيتون والبصل والتوم وشوية توابل تانية مع مزازة الليمون.. هتاكل الطاجن ده وتعيط من فرط الحلاوة