إمتى تعرف إن عندك هشاشة عظام! وتتصرف إزاي؟

عشان الإنسان يتحرك ويشتغل ويقدر يكمل مسيرة حياته اليومية لازم يكون عنده جسم كويس قادر  يتأقلم مع  نظام وطريقة حركته والمسؤول بشكل أساسي عن حركة الإنسان هو الجهاز الحركي المكون من العضلات والأوتار والأربطة من ناحية ومن ناحية تانية العظام والمفاصل.

وبما إن النهاردة اليوم التوعوي لمرض هشاشة العظام.. تعالى نعرفك شوية معلومات تخص المرض ده وفقًا لموقع مايو كلينك المهتم بالشأن الطبي في أحد مقالاته:

في البداية أكيد سمعت عن هشاشة العظام وعن المنتجات والمشروبات الغازية اللي بتسبب هشاشة العظام.. بس عمرك سألت نفسك يعني إيه هشاشة عظام؟

هشاشة العظام أو تخلخل العظام هو مرض روماتيزمي بيؤدي لضعف العظام والشخص بيكون أكثر عرضة للكسر وده بسبب نقص بعض المعادن الرئيسية في الجسم زي الكالسيوم والماغنسيوم وبالتالي بيحصل نقص في كثافة العظام.

طب إيه هي الأعراض اللي لو بتحصلك يبقى لازم تزور دكتور؟

  • ضعف قبضة اليد وهو من أهم أعراض هشاشة العظام.
  •  لو كان عندك وجع شديد ومستمر  في العمود الفقري والرقبة.
  • لو ظهر تقوس أو انحناء في الجزء العلوي من الظهر.
  • لو بتلاحظ بشكل واضح إن فيه قصر في القامة.
  • لو بتتعرض كتير لكسر في العظام.
  • ولو فيه إحساس ضعف عام في العظام.

يا ترى مين أكتر ناس معرضة للمرض ده؟

  • كبار السن أكتر ناس معرضين للإصابة بالمرض ده.
  • فيه بعض الدراسات بتأكد إن النساء صاحبات البشرة البيضاء أكثر عرضة من غيرهم مقارنة بالنساء صاحبات البشرة السمراء اللي بيتميزوا بكتلة عظام قوية.
  • الأشخاص الأقل حجمًا معرضين للمرض ده بسبب نقص كتلة الجسم وبالتالي كثافة العظام.
  • لو هشاشة العظام ليها تاريخ مرضي في الأسرة.
  • التدخين وإدمان الكحول ليهم عامل كبير في الإضرار بمعادن الجسم، وده اللي بيخليهم معرضين أكتر للإصابة بهشاشة العظام.

في النهاية بقى هل فيه حاجة تقدر بيها تحافظ على جسمك من هشاشة العظام؟

  • أول وأهم حاجة، التغذية السليمة: تبعد عن الأكلات أو المشروبات المضرة وتهتم بزيادة الكالسيوم وفيتامين “د”  في جسمك من خلال تناول منتجات الألبان قليلة الدسم والخضروات والسلمون والسردين وتتعرض لأشعة الشمس في أوقات معينة اللي بدورها بتعزز فيتامين “د” في الجسم.
  • وكمان تهتم بالرياضة:  زي المشي والجري أو ممكن تروح الجيم وتمارس الرياضات دي بشكل أفضل لأن هناك كمان ممكن تقوي عضلات جسمك من خلال تمارين رفع الأوزان لتخفيف تحميل الجسم عن العظام وطبعًا تزور دكتور علشان ينصحك إن كنت في حالة تستاهل تاخد مكملات غذائية أو أدوية معينة أو لا.

Related Articles

Back to top button