8 أكلات شتوية معمولة باللبن هتدفيك في الأجواء دي

في ليالي الشتاء الجميلة تحلا السهرة بشوية تسالي.. سواء قاعد مريح بعد ماترجع من الشغل أو سهران في ويك

إند..
وعشان الشتا بيحب الأكل مش هنقولكم لب سوداني .. لكن جمعنالكم 8 وصفات لأكلات شتوية هتشبعكم وهتدفيكم بس ماتنسوش تدعيلنا

1- البليلة

• المكونات:

– كوب قمح مقشر (بليلة)

 – 4 أكواب لبن

-سكر حسب الرغبة

-جوز هند وزبيب ومكسرات للتزيين

• الطريقة:

-انقعي القمح في مياه لمدة ليلة كاملة.

-اسلقيه في مياه لحد ما يستوي ويبقى طري.

-صفّيه وضيفي عليه اللبن والسكر.

-سيبيها تغلي على نار هادية لحد ما تتقل شوية.

-قدميها سخنة وعليها جوز هند وزبيب ومكسرات.

2- الشعرية باللبن

• المكونات:

-كوب شعرية

-4 أكواب لبن

-3 معالق كبار سكر (أو حسب الرغبة)

-معلقة صغيرة زبدة

-فانيليا (اختياري)

-رشة قرفة أو مكسرات للوش (اختياري)

• الطريقة:

-في حلة على النار، سخني معلقة الزبدة وضيفي الشعرية.

-قلّبي الشعرية لحد ما تاخد لون دهبي فاتح.

-ضيفي اللبن على الشعرية، وقلبي كويس.

-لما اللبن يسخن، ضيفي السكر والفانيليا (لو بتحبي).

-سيبيها على نار هادية لحد ما الشعرية تستوي واللبن يتقل شوية.

-قدميها سخنة، وممكن ترشي قرفة أو مكسرات للوش لو بتحبي.

3- المهلبية

• المكونات:

-4  أكواب لبن

-4 معالق كبار نشا

-نص كوب سكر

-فانيليا

-قرفة أو مكسرات للوش

• الطريقة:

-ذوّبي النشا في كباية لبن بارد.

-سخني باقي اللبن مع السكر والفانيليا.

-لما يسخن، ضيفي النشا المذاب وقلبي لحد ما يتقل.

-قدميها في كاسات دافية أو ساقعة ورشي عليها قرفة أو مكسرات.

4- القرع العسلي باللبن

 

• المكونات:

-كيلو قرع عسلي مقطع مكعبات

– 4 أكواب لبن

-كوب سكر

-معلقتين كبار نشا

-فانيليا

-زبيب ومكسرات للوش

• الطريقة:

-اسلقي القرع في شوية مياه لحد ما يطرى.

-اهرسيه وضيفي اللبن والسكر والفانيليا.

-ذوّبي النشا في شوية لبن وضيفيه على القرع.

-قلّبي لحد ما يتقل.

-قدميه في كاسات ورشي زبيب ومكسرات.

5- الأرز المعمر الحلو

• المكونات:

-2 كوب أرز مصري مغسول ومصفى

-4 أكواب لبن

– كوب سكر (أو حسب الرغبة)

-2 معلقة كبيرة قشطة بلدي (أو كريمة لباني)

-2 معلقة كبيرة زبدة

-رشة فانيليا

-رشة قرفة (اختياري)

-زبيب ومكسرات للوش (اختياري)

• الطريقة:

-سخني الفرن على درجة حرارة 180 مئوية (متوسط).

-في طاجن فخار أو بايركس، حطي الأرز المغسول ووزعيه بالتساوي.

-في حلة على النار، سخني اللبن مع السكر والفانيليا لحد ما يبدأ يسخن بس من غير ما يغلي.

-صُبي اللبن الدافي على الأرز في الطاجن.

-ضيفي الزبدة على الوش ووزعي القشطة (أو الكريمة) بحيث تغطي السطح.

-لو بتحبي طعم القرفة، رشي رشة خفيفة على الوش مع شوية زبيب أو مكسرات.

-دخلي الطاجن الفرن لمدة 40-45 دقيقة أو لحد ما الأرز يستوي والوش يتحمر ويبقى دهبي.

-قدميه سخن ودافي في الشتاء.. بيكون دسم ومشبع جدًا.

6 – طاجن البطاطا باللبن 

• المكونات: 

-3 بطاطا متوسطة الحجم

-نص كوب سكر

-نص كوب لبن

-علبة قشطة بلدي أو كريمة

-نص كوب جوز هند مبشور

-مكسرات (حسب الرغبة)

-سمنة لدهن الطاجن

• الطريقة: 

-اغسلي البطاطا كويس وقشريها، وقطعيها حلقات متوسطة السُمك.

-ادهني طاجن بالسمنة كويس، ورصي فيه حلقات البطاطا بشكل متساوي.

-في بولة.. قلّبي اللبن مع السكر لحد ما يدوب تمامًا.

-ضيفي جوز الهند والمكسرات للخليط وقلّبي كويس.

-ضيفي خليط اللبن والسكر على البطاطا في الطاجن.

-دخلي الطاجن فرن سخن على درجة حرارة 180 لمدة نص ساعة لحد ما البطاطا تستوي.

-خرّجي الطاجن من الفرن، وضيفي عليه القشطة ووزعيها كويس على الوش.

-رجعي الطاجن الفرن تاني لمدة 10 دقايق تحت الشواية لحد ما الوش ياخد لون دهبي جميل.

-قدميه سخن بالهنا والشفا.

7- رقاق باللبن

• المكونات:

-10 رقاق بيتي.

-لتر لبن.

-سكر.

• الطريقة:

-أول حاجة كسري الرقاق قطع صغيرة فى صينية.

-بعد كده اغلي اللبن على النار وضيفي السكر حسب الرغبة فيه واقلبي.

-ولما يسخن ضيفيه علي الرقاق وقدميه سخن.

8- التمر باللبن

• المكونات:

-كوب تمر منزوع النوم

-4 أكواب لبن

-سكر حسب الرغبة (لو التمر مش مسكر كفاية)

• الطريقة:

-انقعي التمر في اللبن لمدة ساعة.

-سخني الخليط على نار هادية لحد ما اللبن ياخد طعم التمر.

-ممكن تضربيه في الخلاط لو عاوزة القوام كريمي أكتر.

-قدميه سخن.. ودي تشبه شوية الطريقة الرمضانية وكل سنة وانتوا طيبين