موضوع مايهمكش: جمعنا لك 15 معلومة ماتعرفهاش عن الفستق

الفُستق من المكسرات اللي بنحبها كلنا وممكن ناكلها كـ تسالي لطيفة وبتدخل في أكلات وحلويات وكمان بنشوفها في ياميش رمضان .. ومن المكسرات اللي اللي فيها فوايد كتير.. لكن حبينا نعرفك شوية معلومات ماتعرفهاش عنه وفقا لموقع ratinkhosh.com وموقع Healthline :

1- بيرجع تاريخ زراعة الفستق لـ آلاف السنين في سوريا وبعدها انتشر لبلاد تانية

2- أشجار الفستق بتحتاج 5 سنين عشان تنتج محصولها الأول وبتحتاج لـ 15-20 سنة عشان توصل لذروة الإنتاج

3- الفستق بيتزرع في فصل الصيف وبيحتاج حرارة شديدة

4- أشجار الفستق ارتفاعها حوالي 4 متر .. وبتكون إما ذكر أو أنثى

5- وبتتزرع الشجرة الذكورية في اتجاه الرياح عشان تلقح الأنثوية  .. وبتقدر الشجرة الذكورية الواحدة تلقح 15 شجرة أنثوية

6- اكتر الدول المنتجة للفستق إيران والولايات المتحدة وبعدهم سوريا وتركيا والصين

7- الفستق في إيران معروف بأنه “الذهب الأخضر” وتاني منتج بعد النفط في الصادرات

8- الفستق غني بعناصر مهمة للجسم زي البروتين والألياف والماغنيسيوم والثيامين والفوسفور  والمنجنيز

9- وأكدت الأبحاث إنه بيستخدم للتخسيس عن طريق التحكم في الكميات وده لأن تقشيره بيستغرق وقت ومن خلال القشر بتعرف أكلت قد إيه

10- تركيا من أكتر الدول اللي بتستخدمه في الأكل سواء طبخات أو الحلويات زي البقلاوة التركية المشهورة والآيس كريم

11- الفستق مفيد للأوعية الدموية وصحة الأمعاء وبيقلل مستوى الكوليسترول والسكر في الدم

12- الفستق من المكسرات المنشطة والمقوية للذاكرة

13- بيستخدمه الهنود للتدفئة في فصل الشتاء

14- الفستق بيختلف طعمه وحجمه من بلد للتانية

15- بيتم حصاده في غضون أسبوع إلى ثلاثة أسابيع بعد تحوّل لون القشرة للأحمر وبيتم إزالة القشرة وتجفيفه ثم تحميصه