9 نصايح عشان تحسن لياقتك البدنية 

مين فينا وهو قاعد مع نفسه مافكرش إنه محتاج ينزل جيم أو يمارس أي رياضة أو حتى يخلي باله من نفسه عشان صحته فيبدأ إنه يحسن لياقته البدنية؟

اللياقة البدنية أو الـ Fitness تعتبر أساس أي رياضة بس هي كلمة معناها مختلف شوية بالنسبة لأي شخص فلو فيه برنامج للياقة البدنية مناسب لحد من معارفك ده معناه إن مش بالضرورة يبقى مناسب ليك بس فيه شوية لكن في العموم لو أنت نويت تاخد الخطوة دي فيه شوية خطوات محتاج تبدأ فيهم عشان تحسن لياقتك البدنية زي ما قال موقع “focusfitnessuk” في واحد من مقالاته.. واللي هم:

1- دور على دوافع تخليك تكمل:

عشان تحقق أقصى استفادة ممكنة ليك من رحلتك في تحسين لياقتك البدنية محتاج تعرف الأول الدافع الأساسي اللي هيخليك تعمل كده هو إنك محتاج تعرف تجري ورا ولادك مثلا؟ ولا تدخل ماراثون؟ وعموما إنك توصل لده هو اللي هيساعدك تصحى بدري وتنزل في البرد أو تستحمل العرق في الصيف.. فدور على سبب يخليك تلتزم بالتمرين.

2- حدد أهدافك من التمرين:

مهم إنك تحدد هدفك عشان تشتغل عليه وتتدرب عليه صح عشان تحسن من اللياقة البدنية اللي بتدور عليها.. يعني لو كان هدفك تعرف تعمل “Squat” بـ 100 كيلو أكيد التجديف مش هيبقى مفيد ليك.

3- خليك عارف إن عضلات بطنك بتبدأ تعملها من المطبخ:

بغض النظر عن النشاط الزيادة اللي بتعمله في يومك أكيد النظام الغذائي السئ مش هيساعدك تبقى أحسن.. واتأكد برضه إنك بتاخد سعرات حرارية كفاية وبتغذي جسمك عن طريق إنك بتاكل وجبات مغذية ومش مصنعة.

4- قيس التقدم بتاعك كل فترة وخليك صادق في نفسك:

عن طريق إنك تقيس التقدم بتاعك كل فترة ده هيخليك تشوف أنت ماشي في طريق صح ولا غلط.. اللي أنت بتختار برضه إنك توصله برضه بيبقى معتمد على أهدافك وممكن تقيس التطورات بتاعتك عن طريق إنك تشوف كل شهر هتقدر تجري 5 ميل في قد إيه أو تتابع الأوزان اللي بتشيلها وكل ده هيوضحاك لو كنت ماشي صح ولا فيه حاجة غلط في تدريبك.

أوقات الملاحظات الذاتية مابتكونش دقيقة ولا مفيدة لو هتتجاهل شوية جرامات على الميزان أو هتتجاهل شوية ثواني ودقايق في تقييمك الشهري لنفسك.

5- ظبط التدريبات بتاعتك مع جسمك:

لما لياقتك البدنية تتظبط أكتر لازن تعيد تقييم وظبط التدريبات بتاعتك باستمرار عشان تحافظ على التقدم.. وده معروف في تدريبات القوة باسم “progressive overload” وده بيدل على زيادة الأوزان اللي بتبقى بتعرفها دايما ببطئ وجسمك بيتكييف مع رفعها.. وده بيشمل إن الدامبل اللي بتبقى بتشيله بيبقى تقيل بشكل مش مريح في أخر كل مجموعة وده نتيجته بتكون زيادة الكتلة العضلية وقوتها.

6- ماتتمرنش بصعوبة أوي ولا بسرعة أوي:

لو هتتمرن بسرعة أوي أو تمرينات صعبة أوي ده هيخليك تبقى عرضه أكتر للإصابة وعدم التطور.

7- خليك متنوع:

حتى لو كان هدفك هو إنك تشارك في مارثون ومسابقات جري طويلة فأنت محتاج تعرف إن التنوع ده مفيد لهدفك واستمراريتك.. تمارين القوة والأوزان والكارديو والمرونة كلها مهارات مهمة جدا ومش هتقدر تستفاد منها لو التزمت بالـ Treadmill.

8- اتمرن كارديو:

الوقت اللي الخبراء موصيين بيه للبالغين في تمرين الكارديو هو 150دقيقة في الأسبوع وده ممكن يبقى بنشاط بسيط زي المشي في الجنينة لكن لو كنت عايز ترجع لياقتك البدنية بسرعة فده معناه إنه لازم تكثفه شوية.

الـ HIIT Cardio أو التمرين المتقطع عالي الشدة فعال جدا لتحسين اللياقة البدنية وقالت الأبحاث إنه ممكن يساعد الشخص في الوصول لهدفه بشكل أسرع بكتير من التمارين الرياضية التقليدية وده بيرجع لإنه بيزود قدرة الشخص على حرق السعرات الحرارية حتى بعد ما الشخص يخلصه.. ده غير إنه بيزود قدرة الشخص على التحمل وبيعزز صحة القلب ومستويات وهرمونات الإحساس بالسعادة وبيساعد على فقدان دهون البطن مع إنه بيحافظ على الكتلة العضلية الخالية من الدهون

9- اعمل التمارين اللي أنت مش شاطر فيها أوي:

الطبيعي بتاع البشر إنهم بيميلوا إنهم يعملوا الحاجات اللي بيبقوا شاطرين فيها.. بس ليه تعمل حاجة أنت مش شاطر فيها؟ لإن الحاجات اللي أنت مش شاطر فيها دي لما تحسنها هي اللي هتحسن لياقتك البدنية.. وأكيد الموضوع هيبقى محتاج تحفييز زيادة وجهد أكتر عشان تشتغل على التمارين اللي بتواجه فيها صعوبة لكن على المدى الطويل هتشوف نتايج ده أكتر من لو استمريت على اللي أنت بتتقنه بس.