LEVEL UP: تأجيل طرح Battlefield وملخص أخبار الفيديو جيمز خلال الأسبوع!
خلال الأسبوع الحالي كان في أخبار ظريفة جدا الجيمز ومن غير أي مقدمات.. ما تيجي نشوف!
خلال مؤتمر بلايستيشن يوم الخميس اللي فات، تم الإعلان عن لعبة “Wolverine” واللي هتقدم لنا قصة “وولفرين”، والجميل في الموضوع إن اللعبة من تطوير أستوديو Insomniac Games اللي طور لعبة “Spider-Man” ولكن للأسف مكنش في أي تفاصيل كتير زي ميعاد إطلاقها ولكنها هتكون بشكل حصري لـ”PS5″
وفي خلال المؤتمر نفسه، تم الإعلان عن مجموعة ريماستر “Uncharted: Legacy of Thieves Collection” واللي هيتم طرحها لجهاز PS5 والحاسب الشخصي في مطلع 2022.
وفي نفس السياق، تم الإعلان عن نسخة “GTA V” المٌحسنة واللي هيتم إصدارها في شهر مارس 2022 ولكن من الواضح إن محبين GTA غضبانين بسبب تأخر Rockstar في طرح الجزء الجديد من اللعبة، فعدد الـ”Dislike” وصل لـ 174 ألف مقارنة بـ28 ألف “Like”
واستكمالا لمؤتمر “PS”، تم الإعلان عن اللعبة المحبوبة “God of War: Ragnarok” بفيديو دعائي جديد، واللي هيتم طرحها على “PS4” و “PS5” في العام المقبل.
وبعيدا عن مؤتمر بلايستيشن، توم هندرسون، اللي دايما بيسرب أخبار عن أحدث الألعاب ونسبة كبيرة منها بيكون صحيح، قال إن الجزء الجديد من “Call of Duty” هيكون اسمه “Project Cortez” وهيتم طرحها في 2022 وإن الجزء ده هيكون تكملة ونهاية للعبة “Call of Duty: Modern Warfare”.
وتقرير “VCG” قال إن اللعبة هتكون من تطوير “Infinity Ward” اللي طورت الجزء اللي تم طرحه في 2019، واللعبة أحداثها هتكون عبارة عن حرب بين القوات الخاصة الأمريكية وبين عصابات المخدرات الكولومبية.
في مدونة نشرها موقع بلايستيشن، قال إن لعبة “Gran Turismo 7” هتتطلب اتصال دائم بالإنترنت حتى عند لعب الطور الفردي وإن ده هيشمل نسختين البلايستيشن سواء 4 أو 5.
شركة EA أعلنت إن “Battlefield 2042” هيتم تأجيلها لـ 19 نوفمبر الجاي، بعد ما كان من المفترض إطلاقها في 22 أكتوبر من العام الحالي.
أوسكار جابريلسون، المدير العام لأستوديو “DICE” قال في بيان إن عملية تطوير اللعبة تأثرت بجائحة فيروس كورونا، وإن من المهم تخصيص وقت إضافي لتقديم أفضل تجربة ممكنة للعبة..
ومن المقرر إن اللعبة يتم طرحها على الحاسب الشخصي والمنصات المنزلية زي: PS5 و PS4 و Xbox Series و Xbox One
